اللي باقي م البلاد
و هيبقى ورث للولاد
لب ( سوري ) و فول ( سوداني )
و ف اليمن مليون شنب
باعوا نصيبهم م العنب
كله مجني وكله جاني
ومين صح ومين فلح..؟
مين خسر ومين نجح..؟
دي الشام لو تزرع بلح
يطلع بارود في ثواني ..!!!!
كله مجني وكله جاني
متلغبطين و اللغبطه
بتشدنا لأبعد بعيد
و التوهه كشفت سترها
غوله و ليها الف ايد
خدنا خلاص ع المرمطه
و التكبيرات مش جايبه عيد
حتى النهار طالع حزين
صوته مليان ب الأنين
طالع وهو ملهوش عين
اكمنه مش شايف جديد
و ماشي عمال يعاني
كله مجني وكله جاني
بقلم
سيد صادق
#ديوان_ألبس_قديم
0 التعليقات:
إرسال تعليق